BASTA CU’’E SUONNE !
Tu staje durmenno ‘a troppo tempo ormaje
‘mraccia’’e canzone , ‘o sole , ‘a luna , ‘o mare ,
mentre tenimmo na muntagna ‘e guaje
assapuranno ‘e llacreme cchiù amare .
No , nun se pò campà na “ sceneggiata “
C’’o popolo ch’è sempe ‘o primmo attore
Cu’ na ferita antica maje sanata
E tante e quante spine dint’’o core .
Giesù Cristo scennette ‘ncopp’’a terra
Fui mise ‘ncroce ma resuscitaje
chesta città sta sempe miez’’a guerra
senza truvà nu poco ‘e pace , MAIE !
‘Ncopp’’e disgrazie stanno speculanno
arricamanno ciente e cchiù busche
stammo dint’’a ‘mmunnezza ma nun sanno
‘o sudore che scorre miez’’a via…
‘O sanghe ca se jetta pe’ dà ‘o ppane
a tanta vocche a stomaco vacante
campanno cu’’a speranza ‘e nu Dimane…
suffrenno ‘int’’o silenzio comm’’e sante .
Basta però chisto è ‘o mumento , ll’ora
Tu staje durmenno ‘a troppo tempo e ‘o ssaje
È overo ca vulisse durmì ancora
Ma è fore tempo ‘o suonno ca te faje.
Chitarre , manduline ,serenate ,
so’ solamente na scenografia
sulo ricorde ‘e juorne ormaje passate,
NAPULE , nun se campa ‘e fantasia!
Levate ‘a cuollo ‘e panne d’’a reggina
E miettete cu’’a capa e c’’o pensiero
A straccià tutte quante ‘e ccartuline
Ca nun so’ cchiù ‚o ritratto tuoje sincero .
E arapele chist’uocchie finalmente
Facimmelo stà zitto chistu munno
E faticammo dignitosamente
Pecchè è fernuto l’epoca d’’e suonne .
LUCIANO SOMMA
